جُست: بانُک تو ماھل بلوچ ءِ زُورانسری بیگواھی ءَ یک راجکار ءُ بلوچ زالبولے ءِ بِستار ءَ کُجام رنگ ءَ چارئے؟
پسّو: من یک سْیاسی ورکرے ءِ بِستار ءَ ماھل بلوچ ءِ زُورانسری بیگواھی ءَ گوں بلوچ راج ءَ راج دُژمِنی ءَ ابید ھمے رنگ ءَ چاراں ءُ ماراں کہ ریاست بلوچ زالبولاں بلوچ راجی آجوئی ءِ پِڑ ءَ برداش کُت کنگ ءَ نہ اِنت، آ ھمے لوٹ اِیت کہ بلوچ زالبول چہ سْیاست ءِ پِڑ ءَ وتارا دُور بدار اَنت، آ بلوچ زالبولاں چہ سْیاست ءِ پِڑ ءَ دُور کنگ لوٹ اِیت، ھمے ھاتِر ءَ آ چو کنگ ءَ اِنت۔بلے اے آئی ءِ یک ناکامیں ءُ بے سوبیں کُوشِستے کہ مارا زُوراکی ءِ رنگ ءَ گِندگ پیداک اِنت۔
جُست: شش ءُ ھپت ماہ اِنت کہ بلوچ زالبولانی بیگواھی گوں تْرندی ءَ برجاہ اِنت، پہ درور ھبیبہ پیرجان، نورجان، رشیدہ زھری، بولان ءَ زالبولانی بیگواھی ءُ انوں ماھل بلوچ ءِ بیگواہ کنگ، ریاست چہ بلوچ زالبولانی بیگواہ کنگ ءَ چے ھاسِل کنگ لوٹ اِیت؟
پسّو: من ھمے سرپد باں کہ دُژمِن چہ تہ ءَ ھورک ءُ ھلاس ءُ ھالی اِنت، چی ءَ کہ آئی ءَ مئے مردین آدم ءُ ورناھانی زِندانی کنگ ءَ پد، جنگل ءُ گیابان ءَ ٹپّ ءُ ٹوری ئیں لاش چگل داتگ اَنت، میتگ ءُ ھلک مئے مانداشتگ اَنت، بلے سوبے نہ کُت۔
مرچی آ کہ پہ بلوچ زالبولانی آوار جَنَگ ءُ بیگواہ کنگ ءَ در کپتگ، سَوَب ھمیش اِنت کہ آ بلوچ زالبولاں چہ راجی جُِنز ءُ جُھد ءَ دُور کنگ لوٹ اِیت۔ پرچا کہ مرچی سْیاسی پِڑ ءَ اے راجی جُنز بلوچ زالبولاناں یک شرّیں وڑے ءَ دست ءَ اِنت۔ ءُ آئی ءَ را دیم پہ مِنزل ءِ نیمگ ءَ برّگ ءَ اَنت، پرے ھاتِر ءَ ریاست زُوراکی کنگ ءَ اِنت کہ بلوچ زالبول تُرس ءِ آماچ بِہ بنت ءُ بِہ تُرس اَنت، ءُ چہ وتی راجی جُنز ءَ دزکشّ بہ بنت، یا کہ آجوئی ءِ گْوانک ءُ توار ءَ اِیرموش بِہ کن اَنت ءُ بِہ کن اَنت ءُ ھاموش بِہ بنت، بلے من دِلجماں کہ آ گوں وتی اے زُلماں ھِچبر باج نہ بارت۔
جُست: ریاست کہ یکشل ءَ بلوچ زالبولاں آوار جَنَگ ءُ بیگواہ کنگ ءَ اِنت، اِیشی ءِ اَسرات (اثرات) بلوچ زالبولانی سر ءَ چون ءُ چے پیم کپ اَنت؟
پسّو: منی ھیال ءَ ریاست اے کاراں ھمے نیّت ءَ کنگ ءَ اِنت کہ بلوچ زالبول بِہ تُرس اَنت، ءُ تُرس ءِ آماچ بَہ بنت ءُ چہ راجی آجوئی جُھد ءَ پد بِہ کِنز اَنت ءُ وتارا گِستا بِہ کن اَنت یا دُور بِہ بنت،
بلے! ریاست ءِ اے ھکمت ءِ اَمَلی ما گِنداں کہ بے سوب بوتگ۔ پرچا کہ جُھد ءِ تہ ءَ زالبولانی کِساس کمی ءِ بدل ءَ گیشتر بوھان اِنت، زالبول گیش گوں نتُرسی ءَ راجی جُھد ءِ تہ ءَ وتی کِرد ءَ پیلو کنگ ءَ اَنت۔
ءُ مرچی بلوچ زالبولاں پاکستان ءِ کُلیں پروگرام بے سوب کُرتگ اَنت، ءُ آؤکیں وھد ءَ ھم پاکستان گوں وتی اے رنگیں پروگراماں بے سوب بیت۔
جُست: بانُک مئے گُڈّی جُست گوں ترا چو ے وڑ ءَ اِنت کہ تو اے نگیگیں جاورانی بابت ءَ بلوچ زالبولاں چے کلوہ دَیَگ لوٹ ئے کہ آ راجی جُنز ءَ چون ءُ چے پیم مُھکم بِہ کن اَنت ءُ دیم ءَ بِہ بر اَنت؟
پسّو: من بلوچ زالبولاں گُڈّی ءَ ھمے کلوہ دَیَگ لوٹاں کہ آ گیش ءَ چہ گیش گوں راجی گلاں ھمگرنچ بِہ بنت ءُ زُلم ءِ ھِلاپ ءَ توار چِست بِہ کن اَنت، اگاں ما مرچی زُلم ءِ ھِلاپ ءَ پاد نیاتکیں ءُ توار چِست نہ کُت، اے زُلم ءُ زُوراکی بلوچ راج ءِ سر ءَ ھِچّ رنگ ءَ ھلاس نہ بنت، ءُ نیکہ بلوچ زالبولانی آوار جَنَگ ءُ بیگواھی ھلاس بیت۔ من ھمے سرپد باں کہ بے تواری مئے راجی مَرگ اِنت، ءُ جُھد ءُ مزاھِمت (مزاحمت) مئے راجی ھستی ءِ مانزمان اِنت۔
