تہران/واشنگٹن (ہمگام نیوز) برطانوی اخبار فنانشل ٹائمز نے ایرانی حکومت کے قریب ذرائع کے حوالے سے دعویٰ کیا ہے کہ امریکا کے ساتھ تنازع مزید بڑھنے کی صورت میں ایران مختلف جوابی اقدامات پر غور کر رہا ہے، جن میں یورپ میں موجود امریکی فوجی اثاثوں کو نشانہ بنانے کا آپشن بھی شامل ہے۔
رپورٹ کے مطابق ایرانی افواج نے جنوب مشرقی یورپ، خصوصاً بلغاریہ میں موجود امریکی فوجی تنصیبات کے خلاف ممکنہ کارروائیوں کا جائزہ لیا ہے۔ قبرص کو بھی ممکنہ ہدف کے طور پر زیر غور لائے جانے کا دعویٰ کیا گیا ہے۔
فنانشل ٹائمز کے مطابق ایران نے آبنائے ہرمز سے گزرنے والی زیرِسمندر فائبر آپٹک کیبلز میں خلل ڈالنے کے ممکنہ طریقوں پر بھی غور کیا ہے۔
ایرانی ذرائع کے مطابق ممکنہ جوابی کارروائی کی نوعیت اور شدت کا انحصار امریکا کی جانب سے کیے جانے والے اقدامات پر ہوگا۔ تاہم رپورٹ میں ان ممکنہ منصوبوں پر عمل درآمد کی کوئی تصدیق نہیں کی
گئی۔
